संकल्प ‘नंदिनी’च्या शुद्धिकरणाचा

नंदिनी नदीला प्रदूषणाच्या आणि अस्वच्छतेच्या विळख्यातून बाहेर काढण्यासाठी, तिला गतवैभव प्राप्त करून देण्यासाठी काही सुजाण नागरिकांचे प्रयत्न सुरू आहेत. याचाच एक भाग म्हणून, मानवी साखळी करून नाशिककरांचे लक्ष वेधण्यात आले. भारतीय जनता पक्षाच्या सिडको मंडलाने त्यासाठी पुढाकार घेतला. भाजपाचे ज्येष्ठ नेते व प्रदेश प्रवक्ते लक्ष्मण सावजी यांची ही संकल्पना होती. या वेळी कार्यकर्त्यांनी हातात फलक घेऊन जनजागृती केली. नंदिनी नदीचे सौंदर्यसंवर्धन तर व्हायला हवेच, त्याबरोबरच गोदावरी व तिच्या सर्व उपनद्यांंकडेही असेच लक्ष देण्याची गरज आहे. अरुणा-वरुणा (वाघाडी), गायत्री, सावित्री व मेघा या पाच उपनद्या काळाच्या ओघात लुप्त झाल्या असून सरस्वती नदीचे रूपांतर तर नाल्यात होऊन बराचसा काळ लोटला आहे! महत्त्वाचे म्हणजे गोदावरी नदी बारमाही वाहणे आवश्यक आहे.

पाच जूनला ‘जागतिक पर्यावरण दिना’च्या औचित्याने झालेल्या या उपक्रमात भाजपा मंडलातील सर्व पदाधिकारी, लोकप्रतिनिधी, कार्यकर्ते व पर्यावरणप्रेमी नागरिक उत्स्फूर्तपणे सहभागी झाले. अंजनेरी ते टाकळी दरम्यान 10 टप्प्यांत हा उपक्रम राबविण्यात आला. उंटवाडी पुलापासून शाहूनगर, यमुनानगर व पुढे आयटीआय पुलापर्यंत आणि सातपूर हद्दीत थेट अंबड लिंकरोडपर्यंत, नदीकाठच्या तिरावर 10-10 फूट अंतर राखून कार्यकर्ते साखळीने उभे राहिले. या संदर्भातील प्रबोधनाचा वैशिष्ट्यपूर्ण मजकूर लिहिलेले फलक प्रत्येकाच्या हातात होते. विविध घोषणांनी परिसर दुमदुमून गेला होता. नागरिकांचे लक्ष त्यामुळे वेधले गेले व संदेश प्रभावीपणे पोहोचला. कोरोनाच्या काळातही पुरेशी दक्षता घेऊन एखादा उपक्रम योग्य पद्धतीने कसा राबविता येतो, याचा आदर्श वस्तुपाठच यातून नाशिककरांना मिळाला, असे म्हटले तरी वावगे होणार नाही. या उपक्रमासाठी अतिशय नियोजनबद्ध पूर्वतयारी करण्यात आली होती. सर्व कार्यकर्त्यांनी पांढर्‍याशुभ्र टोप्या परिधान केल्या होत्या, त्यामुळे स्वच्छता व पावित्र्य अधोरेखित झाले. नदीच्या आजूबाजूला असणार्‍या परिसरात पत्रके वाटून त्यांनाही या मोहिमेत सामील करून घेण्यात आले. नंदिनी नदीतिरी ठिकठिकाणी अक्षरश: कचरा कुंडीची बिकट अवस्था निर्माण झाली आहे. अनेक गटारे खुलेआम नदीपात्रात सोडलेली आहेत. मात्र या संदर्भातली जनजागृती हा केवळ एक दिवसाचा जल्लोश न राहता, काम पुढे नेण्याची जबाबदारी संयोजकांनी व महापालिकेने घेतली पाहिजे. दरम्यान महापालिका प्रशासनाने नंदिनी तिरावर संरक्षक भिंत उभारण्याचे ठरविले आहे. तसेच अस्वच्छता, वृक्षतोड करणार्‍यांवर कडक कारवाई करण्याचे निर्देश महापौर सतीशनाना कुलकर्णी व मनपा आयुक्त कैलास जाधव यांनी तातडीने दिले आहेत.