निरोगी जीवनशैलीसाठी ‘हॅबिल्ड’

 

 

दररोज योगासने करण्याची सवय लागली, त्याची आवड रुजली, त्याचे परिणाम शारीरिक तंदुरुस्तीवर दिसू लागले, तर एखादी व्यक्ती आयुष्यभर योगासने करेल. लोकांमध्ये ही आवड रुजवणे, हेच सौरभचे ध्येय. दिसायला छोटे दिसले तरी चांगल्या सवयी रुजवणे हे सोपे काम नाही. शारीरिक मेहनत कमी करण्याची सवय असलेल्या आजच्या बहुसंख्य लोकांमध्ये अशी सवय रुजवणे, हे आव्हानात्मक आहे. व्यायाम व योगासने ही नित्यकर्माइतकीच अत्यावश्यक व्हायला हवीत. त्यासाठी रोजच्या वेळापत्रकातला वेळ राखून ठेवण्याची आणि त्या वेळेला ठरल्याप्रमाणे व्यायाम करण्याची सवय रुजली, की वाढत्या वजनावर ताबा राहतो. अशा वजनदार देहामुळे ज्या शारीरिक तक्रारी सुरू असतात त्या हळूहळू कमी व्हायला लागतात, त्यातूनच दैनंदिन व्यायामाचे महत्त्व रुजायला मदत होते.

 

प्राणायाम एक अमृतानुभव

लेखक – योगतज्ज्ञ मनोज पटवर्धन

 

प्राणायाम म्हणजे काय?, प्राणायामाने रोगाचे निवारण कसे करता येते, प्राणायामासंबंधीचे गैरसमज, प्राणायामाने कर्करोगावर कशी मात केली, प्राणायामातही कशा गमतीजमती घडतात.

 

अशी सर्व अभ्यासपूर्ण, प्रेरणादायी आणि रंजक माहिती या पुस्तकाद्वारे आपल्याला मिळणार आहे. आणि प्रत्यक्ष प्राणायामाच्या प्रक्रिया पुस्तकातून दिल्यामुळे त्या करायलाही सोप्या जाणार आहेत.

सवलत मूल्य : २२५/-

https://www.vivekprakashan.in/books/pranayama/

 

 

 

या ऑनलाइन वर्गात सहभागी होण्यासाठी वयोमर्यादा नाही. त्यासाठी कुठेही बाहेर जायची गरज नाही. आपल्या घरात बसून, आपल्याला कंफर्टेबल वाटेल अशा पोशाखात आणि आपल्या सोयीच्या वेळेत हे प्रशिक्षण घेता येते. सोयीच्या वेळेत अशासाठी म्हटले, की हे वर्ग दिवसभरात सहा वेळा, प्रत्येकी पाऊण तासाचे असतात. यातली आपल्या सोयीची वेळ निवडताना फक्त त्याआधी किमान दोन तास काहीही खाल्लेले नसणे, एवढे पथ्य पाळणे आवश्यक. तसेच वर्ग संपल्यावर किमान अर्धा तास काही न खाणे, ही अट पाळली जायला हवी.

 

 

या वर्गात सहभागी होण्यासाठी जशी वयाची अट नाही तशी आणखी एक सुविधा आहे. ती म्हणजे, प्रत्येक व्यायाम एकाच वेळी दोन प्रकारे करून दाखवण्यात येतो. सौरभ स्वत: आणि त्याचा सहकारी प्रमोद एकाच वेळी प्रात्यक्षिक दाखवत असतात. एक तुलनेने सोपी पद्धत आणि एक नियमित पद्धत. म्हणूनच ज्यांना खुर्चीत बसून करणे सोयीचे आहे तेही या वर्गात सहभागी होतात. या प्रशिक्षण वर्गाचा अंदाज येण्यासाठी 14 दिवसांचा पूर्णपणे मोफत वर्गही दररोजच्या सहा बॅचमध्ये उपलब्ध आहे. ज्यांना यातून होणारे लाभ दिसू लागतात ते त्यानंतर रीतसर फी भरून प्रशिक्षण वर्ग सुरू करतात.

 

 

‘हॅबिल्ड’ हा नावापासूनच वेगळा असणाराऑनलाइन उपक्रम आहे. व्यायाम रोज करायचा ठरवला तर तो टाळण्याची सतराशे साठ कारणे तयार असतात; पण सौरभ अतिशय सुहास्य वदनाने आणि ऋजू शब्दांत व्यायामाचे आयुष्यातील महत्त्व लोकांना पटविण्यात यशस्वी झाला आहे. मोफत प्रशिक्षण वर्गानंतर सशुल्क प्रशिक्षण वर्गात दाखल होणार्‍यांची वाढती संख्या बघितली तर हे लक्षात येते. योग प्लॅटफॉर्म नाही, तर सवयींची कला शिकवणारे संपूर्ण पॅकेज आहे. जशी सहभागींची संख्या वाढते आहे तसे सौरभला मदत करणार्‍या सहकार्‍यांचे हातही वाढत आहेत. आज सौरभसह 250 हून अधिक जण ‘हॅबिल्ड’च्या माध्यमातून लोकांमध्ये व्यायामाची व योगासनांची आवड रुजविण्यासाठी प्रयत्नशील आहेत.

 

 

 

जानेवारी 2024 मध्ये, सौरभ बोथरा आणि त्यांच्या हॅबिल्डमधील टीमने 21 दिवसांचे ऑनलाइन योग शिबिर आयोजित केले. 92 देशांतील 4.5 लाख जण त्याला उपस्थित होते. 12 जानेवारी 2024 रोजी, ’हॅबिल्ड’ वेलनेस प्लॅटफॉर्मने एकाच वेळी 2,46,252 जणांचे एकत्रित सत्र घेतले. योग-व्यायामासाठी एकाच वेळी सर्वाधिक उपस्थिती असलेला गिनीज वर्ल्ड रेकॉर्ड हॅबिल्डच्या नावावर नोंदवला गेला. यावर सौरभ बोथरा म्हणतात, ‘केवळ विश्वविक्रम करणे हा उद्देश नव्हता, तर लोकांना निरोगी जीवनशैलीसाठी प्रेरित करणे हे प्रमुख उद्दिष्ट होते आणि त्यात आम्ही यशस्वी झालो.’ या माध्यमातून समाजात सकारात्मक बदल घडवून आणण्यासाठी सौरभ बोथरा यांनी स्वतःला या कामासाठी पूर्ण वाहून घेतले आहे. आयआयटी बीएचयूमधून इंजिनीअर झालेल्या सौरभ यांनी लोकांना योग-व्यायाम शिकवायला बीएचयूपासूनच सुरुवात केली. अनेकांना त्याचा फायदा झाल्याने सौरभ यांनी याचे हे वर्ग घेण्यासाठी भारतभर प्रवास केला.

 

 

अनेक शहरांमध्ये निःशुल्क शिकवले आणि कालांतराने स्वत:ची स्वयंसेवी संस्था उभी केली. 2020 मध्ये, जेव्हा लॉकडाऊनमुळे जगभरातील लोक घरात बंदिस्त झाले, तेव्हा त्यांनी नागपूर येथून प्रथम झूम आणि यूट्यूबवर योगाचे धडे देण्यास सुरुवात केली. त्यांचे मित्र प्रमोद यादव यांच्यासोबत, त्यांनी दररोज सकाळी 45 मिनिटांचे सत्र आयोजित केले. प्राणायामाचे काही सहजसोपे प्रकार, सूर्यनमस्कार आणि शरीराच्या लवचीकतेसाठी विविध व्यायामाचे प्रकार असे मार्गदर्शनाचे स्वरूप असते. लोकांना याचा फायदा होतो आहे, हे लक्षात आल्यावर ‘हॅबिल्ड’चा व्याप वाढू लागला. मग त्यांनी याला आणखी काही जोड दिली. बहीण त्रिशला बोथरा आणि सहाध्यायी अंशुल अग्रवाल यांच्यासमवेत त्यांनी ‘हॅबिल्ड’ (Habuild) ची पायाभरणी केली. त्याचे सदस्य केवळ भारतातच नाही, तर युनायटेड स्टेट्स, कॅनडा, दुबई आणि सिंगापूरमध्येही आहेत.

 

 

 

सौरभ बोथरा म्हणतात, ‘आमच्या या वर्गांमुळे लोकांनी लक्षणीय बदल अनुभवले आहेत. अनेक जण नियमित व्यायामामुळे दिवसभर उत्साही राहताहेत. आम्ही एक टीम म्हणून सतत नवीन कल्पनांवर विचारमंथन करतो. त्यातूनच योगवर्गांना नृत्य आणि स्ट्रेचिंगच्या मार्गदर्शनाची जोड देण्यात आली. त्याचाही लोकांना फायदा होताना दिसतो आहे. या सगळ्यातून शरीर आणि मनाचं स्वास्थ्य सुधारल्याचे अनेक जण सांगत आहेत.’

 

 

’आम्ही या माध्यमातून लोकांमध्ये चांगल्या आणि शरीर-मनासाठी अत्यावश्यक सवयी रुजवत आहोत. याच सवयी तुमच्यात सकारात्मक बदल घडवून आणतात.’ सवयी रुजवणे या एकाच गोष्टीवर काम करत आज सौरभ बोथरा आणि त्यांच्याइतक्याच उत्साही टीमने लाखो लोकांच्या जीवनात परिवर्तन घडवून आणले आहे.

 

 

सौरभ बोथरा यांनी ‘हॅबिल्ड’च्या माध्यमातून समाजाला निरामय ठेवण्याचे कार्य असेच निरंतर चालू ठेवावे, हीच सदिच्छा.