शिवाजी ही चलेगा!

 

पुण्यश्लोक छत्रपती शिवाजी महाराजांची तारखेप्रमाणे जयंती 19 फेब्रुवारी रोजी राज्यभर मोठ्या प्रमाणावर साजरी झाली. छत्रपती शिवाजी महाराजांच्या जयंतीनिमित्त विविध गडकिल्ल्यांवरून आपआपल्या गावात शिवज्योत घेऊन जाणारी तरुणाई जागोजागी दिसून आली. जगाच्या पाठीवर एकमेव छत्रपती शिवाजी महाराज असे आहेत, जे महाराष्ट्रातील सर्व वयोगटातील नागरिकांना आपल्या हृदयस्थानी पूज्य वाटतात. त्यामुळे तारखेप्रमाणे आणि तिथीप्रमाणे ही शिवजयंती साजरी केली जाते. या वर्षी महाराष्ट्र शासनाने शिवनेरी किल्ल्यावर तीन दिवस शिवजयंती महोत्सव आयोजित केला होता. त्याचप्रमाणे ज्या आग्य्राच्या सदरेत औरंगजेबाने छत्रपतींचा अपमान करण्याचा प्रयत्न केला, तेथेच या वर्षी भव्यदिव्य शिवजयंती उत्सव झाला. एकूणच पुण्यश्लोक छत्रपती शिवाजी महाराजांना अभिवादन करण्यासाठी सर्व शिवभक्त व राष्ट्रीय विचारांनी भारावलेले नागरिक पुढाकार घेत आहेत.

 

 

 

छत्रपती शिवाजी महाराजांची जयंती अशी व्यापक स्वरूपात का होते? आपल्या देशात महापुरुषांची मांदियाळी आहे, तरीही छत्रपती शिवाजी महाराजांची जयंती इतक्या मोठ्या प्रमाणात का साजरी होत असते? याचे उत्तर शोधायचे, तर असे म्हणता येईल की, छत्रपती शिवाजी महाराज हे अनेकांचे प्रेरणास्थान आहेत. छत्रपती शिवाजी महाराज हिंदू पदपादशाहीचे उद्गाते आहेत. आपले सत्त्व आणि तत्त्व विसरून गेलेल्या समाजाला जागृत करण्याचे काम छत्रपती शिवाजी महाराजांनी केले आणि हिंदवी स्वराज्याची स्थापना केली. आदर्श राजा कसा असावा याचा वस्तुपाठ शिवछत्रपतींनी प्रस्तुत केला. हा देश माझा आहे, देशाची संस्कृती माझी आहे, देशातील सर्व लोक माझे बांधव आहेत, त्यांच्या उत्कर्षासाठी मी सतत प्रयत्न केला पाहिजे, माझ्या देशावर, माझ्या संस्कृतीवर जर कोणी आक्रमण केले तर ते मी सहन करता कामा नये, त्याच्याविरुद्ध संघर्ष केला पाहिजे, मी कुणाचे स्वातंत्र्य हिरावून घेणार नाही, त्याच वेळी मी पारतंत्र्यातदेखील राहणार नाही.. हे शिवविचारांचे आणि शिवकार्याचे सार आहे. हा शिवविचार एका जाती-प्रांतापुरता मर्यादित नाही. हा विचार राष्ट्रीय आहे, तसाच वैश्विकही आहे. देव-धर्म-देशाला अग्रस्थान देणारे छत्रपती शिवाजी महाराज हे आमचे आदर्श नसतील, तर कोणाला आदर्श मानावे? राष्ट्रीय पातळीवर छत्रपती शिवाजी महाराजांची जयंती साजरी होत असताना काही मंडळींना पोटशूळ सुरू झाला आहे. या पोटशूळामुळे काही ठिकाणी आगळीक झाली आहे. महाराष्ट्रात धुळे येथे आणि दिल्लीतील जेएनयूमध्ये या घटना घडल्या असून त्यांचा निषेध केला पाहिजे.

 

 

 

धुळे शहरात छत्रपती शिवाजी महाराजांच्या जयंतीनिमित्त आयोजित मिरवणुकीवर दगडफेक केली गेली आणि त्यात स्त्रिया व लहान मुले जखमी झाली. दगडफेक करणारे स्वाभाविकपणे छत्रपती शिवाजीराजांचे विरोधक आहेत, हे वेगळे सांगण्याची गरज नाही.प्रसारमाध्यमांनी हल्लेखोरांना अज्ञात म्हटले असले, तरी हे अज्ञात हल्लेखोर कोण आहेत हे सर्वांना माहीत आहेच. अशी दगडफेक करणारे गट सक्रिय होत असताना राज्य सरकार शांतपणे बघत बसण्यापेक्षा काही करताना दिसत नाही, या गोष्टीचे आश्चर्य वाटते आहे. केवळ शिवजयंतीच्या मिरवणुकीवर ही दगडफेक झाली नसून हिंदू समाजाच्या अस्मितेवर आणि श्रद्धांवर केलेला हल्ला आहे, हे लक्षात घेतले पाहिजे. ही गोष्ट शासनाने दुर्लक्ष करावी अशी नसून तातडीने कारवाई करून योग्य संदेश देण्याची आहे. महाराष्ट्र राज्य शासन लवकरच अज्ञातांचा बुरखा फाडून त्यांचा चेहरा उघडा पाडेल.

 

 

छत्रपती शिवाजी महाराजांचा अपमान करणारी अशीच घटना दिल्लीतील जेएनयूमध्ये झाली. दिल्लीतील जवाहरलाल नेहरू विश्वविद्यापीठ मागील काही वर्षांपासून शिक्षण, संशोधनापेक्षा वेगळ्याच कारणांमुळे प्रसिद्धीच्या झोतात आले आहे. अनेक विद्यार्थी संघटना प्रशासनाला वेठीस धरून आपला विचार प्रस्थापित करण्यासाठी प्रयत्न करत असतात. अनेक आंदोलने करून देशहितासाठी कायद्यांना विरोध करत असतात. अशा संघटनांनी जेएनयूमध्ये आयोजित छत्रपती शिवाजी महाराजांच्या जयंतीला विरोध केला गेला. छत्रपती शिवाजी महाराजांची प्रतिमा फेकण्यात आली. हार-फुले उधळून टाकण्यात आले. हे दुष्कर्म करणार्‍या संघटनेचे नाव आहे ‘स्टुडंट फेडरेशन ऑफ इंडिया’. ही विद्यार्थी संघटना डाव्या विचारसरणीच्या प्रभावाखाली असून शिवजयंतीला विरोध करताना ‘शिवाजी नहीं चलेगा’ अशा घोषणा देण्यात आल्या. शिवजयंती साजरी करणार्‍या अखिल भारतीय विद्यार्थी परिषदेच्या कार्यकर्त्यांना मारहाण करण्यात आली. दिल्लीत घडलेल्या या घटनेची आणि दिल्या गेलेल्या घोषणेची गंभीर दखल घेणे आवश्यक आहे. जे जे राष्ट्रविरोधी आहे, समाजाला तोडणारे आहे, ते ते डाव्या विचारसरणीच्या संघटना आग्रहाने करत असतात. त्यामुळे त्यांना हिंदू समाजाची अस्मिता जागृत करणारे शिवछत्रपती पचनी पडणे अशक्य कोटीतील गोष्ट आहे, हे एक वेळ समजून घेता येईल. मात्र विरोध करताना दिलेली घोषणा आणि त्यामागची भूमिका कोणती आहे, त्याचा अर्थ काय होतो हेही समजून घेतले पाहिजे. ‘शिवाजी नहीं चलेगा’ असे म्हणत असताना काय काय नाकारले जाते? छत्रपती शिवाजी महाराजांची ओळख देव, देश आणि स्वधर्म यातूनच होते. आपल्या संस्कृतीची पाठराखण म्हणजेच शिवविचार होय. छत्रपती शिवाजी महाराज म्हणजे राष्ट्रीय विचार, आचार आणि संस्कार होत. त्यामुळे शिवाजी नहीं चलेगा असे म्हणताना वरील सर्व गोष्टींना विरोध केला जातो. तीन शब्दांची ही घोषणा म्हणजे देशाचा वारसा नाकारणे. वर म्हटल्याप्रमाणे जे राष्ट्रीय विचारांचे आहे, त्याला विरोध करत राहणे हा डाव्यांच्या जगण्याचा ऑक्सिजन आहे. त्यामुळे त्यांनी छत्रपती शिवाजी महाराजांच्या जयंतीला केलेला विरोध स्वाभाविक आहे. त्यामुळे जेएनयूमध्ये दिली गेलेली घोषणा विसरता कामा नये आणि आपल्या कृतीतून दाखवून द्यावे लागले की, ‘शिवाजी ही चलेगा!’.

 

 

शिवाजी ही चलेगा असे म्हणताना, जागतिक पातळीवर आपल्या भारताला अव्वल स्थान प्राप्त होताना सर्वांच्या स्मरणात आणि कृतीमध्ये छत्रपती शिवाजी महाराज असायला हवेत. छत्रपती शिवाजी महाराज म्हणजे धगधगता राष्ट्राभिमान आणि शिवरायांनी आपल्या कृतीतून साकार केलेला सामाजिक एकतेचा आदर्श होय. हा आदर्श आता समाजजीवनात प्रकट होताना दिसतो आहे. केंद्रात आणि राज्यात छत्रपती शिवाजी महाराजांना आदर्श मानणारे लोक नेतृत्व करत आहेत. त्यांनी आपल्या कृतीतून शिवविचार प्रखरपणे मांडायला हवा. कारण आजच्या काळात शिवविचार हाच तारक मंत्र आहे आणि म्हणूनच सर्व पातळ्यांवर एकच स्वर उमटला पाहिजे, ‘शिवाजी ही चलेगा’. हा ज्वलंत शिवविचार अमलात आणताना शिवद्रोही व्यक्ती, संस्था, संघटना यांच्या बाबतीतही गंभीरपणे विचार केला पाहिजे.