मुंबईच्या भटक्याची कोकणातील दर्या फिरस्ती

 

 चिन्मय म्हणतात, ''आजच्या पिढीला इतिहास माहिती नसल्याने त्यांचे दुर्लक्ष होणे साहजिक आहे. त्यांना इतिहास, आपल्या राजांचे शौर्य माहिती करून द्यायला हवे.'' पत्रकारितेचे शिक्षण घेऊन त्या क्षेत्रातच नोकरी करताना चिन्मय यांना आपली संस्कृती, आपलं कोकण याविषयी आस्था वाटू लागली आणि त्याच वेळी कोकणचा इतिहास वाचनात आला. कोकणावर निसर्गाने सौंदर्याची मुक्तहस्ते उधळण केली आहे तसेच या भूमीला हजारो वर्षांचा ऐतिहासिक वारसा लाभला आहे. याच कोकणात पर्यटन सुरु झाले तर पर्यटक कोकणाकडे वळतील. त्यातून स्थानिकांचे अर्थार्जनाचे नवे मार्ग खुले होतीलच तसेच कोकणाविषयी, इथल्या वैशिष्ट्यांविषयी जागृतीसुद्धा होईल. चिन्मय यांनी आपल्या ब्लॉगमधून इतिहास व माहितीसोबतच छायाचित्रे व व्हिडीओसुद्धा मोफत उपलब्ध करून दिले आहेत. येत्या दसऱ्याला ते दर्या फिरस्तीच्या संकेतस्थळाचेही उदघाटन करत आहेत. या संकेतस्थळावरून कोकण कसे पाहाल? कोकणात काय पाहाल? कसे पोहोचाल? जेवणाची तसेच मुक्कामाची व्यवस्था कुठे व कशी होऊ शकेल? याबाबत माहिती मिळेल.